លោកឧត្តមសេនីយ៍ឯក ស ថេត អនុញ្ញាតឱ្យប្រតិភូនគរបាលទីក្រុងសៀងហៃ នៃសាធារណរដ្ឋប្រជាមានិតចិនអញ្ជើញជួបពិភាក្សាការងារ ពង្រឹងកិច្ចសហប្រតិបត្តិការសន្តិសុខ
25-December-2019 | ដោយ ពលមនសិការ
ភ្នំពេញ៖ ឯកឧត្តម ឧត្តមសេនីយ៍ឯក ស ថេត អគ្គស្នងការរងនគរបាលជាតិនិងជាស្នងការនគរបាលរាជធានីភ្នំពេញនៅ រសៀលថ្ងៃទី២៤ ខែធ្នូ ឆ្នាំ២០១៩ នៅស្នងការដ្ឋាននករបាលរាជធានីភ្នំពេញ បានអនុញ្ញាតឱ្យប្រតិភូនគរបាលទីក្រុងសៀងហៃដឹកនាំដោយ លោកyaun zhihang ស្នងការរងនៃមជ្ឈមណ្ឌលបញ្ជាការដ្ឋាននគរបាលទីក្រុងសៀងហៃនៃសាធារណរដ្ឋប្រជាមានិតចិន អញ្ជើញចូលជួបពិភាក្សាការងារស្តីពីការបង្កើនកិច្ចសហប្រតិបត្តិការលើការងារសន្តិសុខ រក្សាសុវត្ថិភាព ស្ថិរភាព បង្ការទប់ស្កាត់បទល្មើសឆ្លងដែនខុសច្បាប់និងជាពិសេសបង្កើនចំណងមិត្តភាព សាមគ្គឺភាព ការទំនាក់ទំនងរវាងនគរបាលរាជធានីភ្នំពេញនិងនគរបាលទីក្រុងសៀង ហៃឱ្យកាន់តែរឹងមាំ។
ឯកឧត្តម ឧត្តមសេនីយ៍ឯក ស ថេត អគ្គស្នងការរងនគរបាលជាតិនិងជាស្នងការនគរបាលរាជធានីភ្នំពេញ បានមានប្រសាសន៍ស្វាគមន៍យ៉ាងរាក់ទាក់ចំពោះប្រតិភូនគរបាលទីក្រុងសៀង ហៃ ដែលបានអញ្ជើញមកទស្សនៈកិច្ចការងារនៅក្នុងព្រះរាជាណាចក្រកម្ពុជា និងក៏បានអញ្ជើញមកជួបពិភាក្សាការងារនៅស្នងការដ្ឋាននគរបាលរាជធានីភ្នំពេញពីកិច្ចសហប្រតិបត្តិការ និងលើកឡើងពីការផ្លាស់ប្តូរបទពិសោធន៍ទៅវិញទៅមក លើការងារគ្រប់គ្រងសន្តិសុខ សណ្តាប់ធ្នាប់ ដើម្បីយកចំណុចល្អៗទៅអនុវត្ត ក្នុងការដឹកនាំគ្រប់គ្រងដោយប្រសិទ្ធភាពពាក់ព័ន្ធនិងការងារសន្តិសុខ និងសណ្តាប់ធ្នាប់នោះ។
ឯកឧត្តម ឧត្តមសេនីយ៍ឯក ស ថេត ក៏បានជម្រាបជូនទៀតថា ការទំនាក់ទំនងរវាងនគរបាលជាតិកម្ពុជានិងនគរបាលចិន មានចំណងមិត្តភាពរហូតដល់ពេលនេះគឺដោយសារផ្តើមចេញពីការសហការទំនាក់នងល្អរវាងអគ្គស្នងការនគរបាលជាតិកម្ពុជានិងអគ្គស្នងការនគរបាលចិន។នគរបាលនៃប្រទេសទាំង២ក៏ដូចជាផ្នែកការងារមួយចំនួនរបស់នគរបាលទីក្រុងសៀង ហៃ ក៏ធ្លាប់មានកិច្ចសហប្រតិបត្តិការគ្នាចូលរួមបង្ការទប់ស្កាត់និងបង្ក្រាបបានបទល្មើសជាច្រើនរួចហើយផងដែរ។
ឯកឧត្តម ឧត្តមសេនីយ៍ឯក ស ថេត ក៏បានជម្រាបជូនប្រតិភូនគរបាលទីក្រុងសៀង ហៃ ឱ្យដឹងទៀតថា ទីក្រុងភ្នំពេញជាមជ្ឈមណ្ឌលពាណិជ្ជកម្ម សេដ្ឋកិច្ច វប្បធម៌ និងការប្រមូលផ្តុំគ្រប់ស្ថាប័នរដ្ឋ។ ក្រោយពីប្រទេសកម្ពុជាទទួលបានសុខសន្តិភាពពេញលេញរាជធានីភ្នំពេញបាននិងកំពុងមានការអភិវឌ្ឍរីកចម្រើនគ្រប់វិស័យ គ្រាដែលប្រទេសកម្ពុជាបានរក្សានូវកំណើនសេដ្ឋកិច្ចប្រមាណ៧ភាគក្នុងរយៈពេលប៉ុន្មានឆ្នាំចុងក្រោយនេះ។ភាពរីកចម្រើននេះហើយដែលធ្វើឱ្យទីក្រុងភ្នំពេញមានការកកស្ទះចរាចរណ៍ដែលរដ្ឋាភិបាលក៏ដូចជារដ្ឋបាលសាលាក្រុងកំពុងដាក់ចេញវិធានការដោះស្រាយ។ ដោយឡែកការងារសន្តិសុខទីក្រុងភ្នំពេញមានសន្តិសុខ សុវត្ថិភាពល្អ ពុំមានបទល្មើសអ្វីធំដុំកើតឡើងនោះឡើយ។កម្លាំងការពារសន្តិសុខកម្ពុជាមានសមត្ថភាពគ្រប់គ្រាន់ក្នុងការពាររក្សាសុវត្ថិភាពទាំងប្រជាពលរដ្ឋកម្ពុជានិងជនបរទេសទូទៅដែលមកបណ្តាក់ទុនរកស៊ីនិងមកទេសចរណ៍ស្របច្បាប់នៅព្រះរាជាណាចក្រកម្ពុជា។
លោកyaun zhihang ស្នងការរងនៃមជ្ឈមណ្ឌលបញ្ជាការដ្ឋាននគរបាលទីក្រុងសៀងហៃនៃសាធារណរដ្ឋប្រជាមានិតចិន ក៏បានមានប្រសាសន៍និងវាយតម្លៃខ្ពស់នៃការរីកចម្រើនរបស់ប្រទេសកម្ពុជា និងមានសន្តិសុខស្ថិរភាពល្អ។
លោកក៏បានជម្រាបជូនទៀតថា ការមកបំពេញទស្សនៈកិច្ចការងារនៅក្នុងប្រទេសកម្ពុជាក៏ដូចជាអញ្ជើញមកជួបពិភាក្សាការងារជាមួយស្នងការនគរបាលរាជធានីភ្នំពេញ ក្នុងគោលបំណងដើម្បីពង្រឹងកិច្ច សហប្រតិបត្តិការការងារសន្តិសុខរវាងនគរបាលជាតិកម្ពុជានិងនគរបាលទីក្រុងសៀង ហៃ ឱ្យកាន់តែល្អប្រសើរ ។
លោកyaun zhihang ក៏បានលើកឡើងទៀតថា នគរបាលចិននិងនគរបាលជាតិកម្ពុជា កន្លងមកធ្លាប់បានសហការគ្នាហើយចេញប្រតិបត្តិការបង្ក្រាបបទល្មើសសម្រេចបានលទ្ធផល។ពាក់ព័ន្ធនិងការមកធ្វើការរកស៊ីនិងមកទេសចរណ៍របស់ជនជាតិចិននៅប្រទេសកម្ពុជាស្របច្បាប់ លោកក៏បានលើកឡើងសំណូមពរកម្លាំងនគរបាលជាតិកម្ពុជាជួយការពារអាយុជីវិតនិងទ្រព្យសម្បត្តិ។ លោកក៏បានលើកឡើងមិនគាំទ្រជនជាតិចិនដែលប្រព្រឹត្តបទល្មើសខុសច្បាប់ហើយលើកទឹកចិត្តកម្លាំងនគរបាលកម្ពុជាចាត់វិធានការតាមផ្លូវច្បាប់ក្នុងករណី ពួកគេធ្វើសកម្មភាពប្រព្រឹត្តបទល្មើសខុសច្បាប់នោះ៕
ចំនួនអ្នកទស្សនា
- ថ្ងៃនេះ1311
- ម្សិលមិញ4251
- សប្តាហ៍នេះ27901
- ខែនេះ222501
- ឆ្នាំនេះ222501
- សរុប20664957